विनोदाच्या नावे । ओढाव्या तंगड्या
भराव्या तुंबड्या । टवाळांनी *१

घसरावे नीट । देहव्याधीवर
फुका गहिवर । मग यावे

ऊतवावी कढी । शिळीच कितिदा
शिळाच मलिदा । पुन्हा द्यावा

एवढे करून । मिरवावे साव
लांडग्यांनी गाव । ओसंडावे

करावा अचूक । व्यंगावरी घाव
विडंबन नाव । तया द्यावे

बाळगावे शौर्य । झोडपावे जना
तोच थोरपणा । सदा माना

 म्हणवावे मग । कैवल्याची मूर्ती
निष्कलंक कीर्ती । अपेक्षावी

घातल्या घावांची । धरू नये तमा
गुन्हेगारा क्षमा । साक्ष आहे

करीत सुटावे । टिप्पण्या सुसाट
जसाकी पिसाट । वारा वाहे

आणिक करावी । वर शिरजोरी
"खिलाडू चाकोरी । सापडेना"

कुल्फी म्हणे देवा । अनाथांच्या नाथा
वाचवावे आता । विनोदाला

--कुल्फी
३.३.२००६

टीपः १. आयडी वाल्या टवाळांशी या टवाळाचा संबंध नाही