काय करावे?
[आचरटपणापलीकडे या ओव्यांची फारशी किंमत नाही.]
उन्हाळ्यासाठी पाणी न ठेवून | नदी वेगे जाता पळून |
भक्कम दगडांचे धरण बांधून | तिला अडवता येतसे || १ ||
अगदी आपला नेम धरून | तोफ सुटता धडधडून |
हळुच बाजूला सरून | मारा चुकविता येतसे || २ ||
अंतराळी कडकडून | वीज घरावरी पडता तुटून |
उंच खांबांत बांधून | पाताळी सोडिता येतसे || ३ ||
सावकारांनी वैर धरून | जप्ती आणिता दावा करून |
मागील बाकी देऊन | तिला उठविता येतसे || ४ ||
अगदी नीट रोख धरून | म्हैस मागी येता धावून |
एकदम छत्री उघडून | तिला पळविता येतसे || ५ ||
जुन्यानव्याची चोरी करून | भिकार कवि येता कविता घेऊन |
कशी तरी एकदा वाचून | चुकविता येतसे || ६ ||
सर्वांस उपाय येत दिसून | परि एका गोष्टीस आहे न्यून |
तोंडाळ बायको कडकडून — | येता, काय करावे? || ७ ||
गोविंदाग्रज
गोविंदाग्रजांच्या वाग्वैजयंतीतल्या आवडलेल्या कविता मनोगतींसाठी देण्याचा मानस आहे. ह्या उपक्रमातली ही पहिली कविता.
