काय करावे?
[आचरटपणापलीकडे या ओव्यांची(ही) फारशी किंमत नाही.]
ताजे लिखाण पाहून । "अहाहा!" प्रतिसाद देऊन ।
उपकारातळी दाबून । प्रतिसाद घेता येतसे ॥ १ ॥
नवीन सदस्य पाहून । नवखा आहे हे जाणून ।
उसळता चेंडू टाकून । बळी मिळवता येतसे ॥ २ ॥
मुळमुळीत काव्य खरडून । कुणी न देती प्रतिसाद, वाचून ।
दुसऱ्या नावे प्रवेशूून । प्रतिसाद देता येतसे ॥ ३ ॥
बराच यत्न करून । काही न सुचे झडकरून ।
वादग्रस्त चर्चा टाकून । धूळ उडवता येतसे ॥ ४ ॥
जुन्यानव्याची चोरी करून | टुकार कवी येता कविता घेऊन |
"वा! छान!" सा प्रतिसाद देऊन | वेळ टाळता येतसे || ५ ||
मीच तो शहाणा म्हणून । अकांडतांडव करून ।
असंबद्धसे लिहून । प्रौढी मिरवता येतसे ॥ ६ ॥
सर्वांस उपाय येत दिसून | परि एका गोष्टीस आहे न्यून |
कोणी बुद्धिमान समोरून — | येता, काय करावे? || ७ ||
प्रेरणा - गोविंदाग्रजांची "काय करावे?" ही सुंदर कविता.
