नियतीचा कसा हा वार झाला
वेचली जी फुले तो हार झाला
आधार देणारा खांदाच कसा
खाद्यांसाठी आज भार झाला
मुकेपण धरून आला आक्रोश
अश्रूंचाच आवाज फार झाला
पुराव्या अभावी कायदा कसा
गुन्हेगारी पुढे लाचार झाला
आतल्या आत जळणारा निखारा
बाहेरून कसा पुर्ण गार झाला
हुंदकाच काय निघाला तिचा
बघ्यांची गर्दी नि बाजार झाला
मोत्याशी दुरावताच शिंपला तो
जगाच्या नजरेत बेकार झाला
तू नजरेचा धनुष्य झुकावताच
प्रेमाचा तीर आर पार झाला
आजची पिढी, नव्या विचारांना
कालचा सुर्योदय भंगार झाला
रद्दीला मोल आहे कळल्यावर
मला विकाया आत्मा तयार झाला
तू दगा देताच देगेबाज तो
काळजावरचा घाव यार झाला
'माणूस' नावाचा त्याच्या कडून
चुकून विचित्र प्रकार झाला
@ सनिल पांगे
