गांधीजयंतीस सुट्टी आहे छान
करू पेयपान मित्र सारे
आठवती आज आम्हा प्रिय बापू
कोंबड्याच कापू पार्टीसाठी
गांधीबाबा होते भलतेच ग्रेट
बियरची क्रेट आणा एक
बापूजींच्या नावे म्हणा चांगभले
पेल्यासंगे पेले भिडवून
गांधीजी म्हणाले त्यांना चले जाव
चिकनपुलाव छान आहे
गांधींचा सिनेमा पाहिला कँपात
ब्लॅक तिकिटात फार पूर्वी
पाचशेच्या नोटी पाहुनिया गांधी
मीही गांधीवादी झालो आता
थोर उपकार गांधीजी महान
चरायास रान आम्हा दिले
गरीबा पाहून गांधी अर्धनग्न
आम्ही मात्र मग्न पार्टीमध्ये
