कोणा कसे कळावे की काय साहिले मी
गझलेस मनोभावे आळवुन पाहिले मी ॥ धृ ॥
ते 'छंद' पोसताना निघते असे दिवाळे
'गागाल गाल' गाता की गालगुंड झाले
तोंडास फेस माझ्या कोणास ना कळाले
वृतात मी लिहीले ह्याचेच वृत्त झाले !
वेडात काय गोडी चाखून पाहिले मी ॥१॥
वस्तीत रदीफांच्या काफिले काफियांचे
मिसरे, अलामतीचे ते दाखले तयांचे
मक्त्यास हा उतारा- हे स्थान 'मातल्यां'चे
जमिनी मशागतीचे कुळकायदे युगांचे !
हे काम जोखमीचे, परि शांत साहिले मी ॥२॥
