(परदेशात राहणाऱ्या मुलाचे मन त्याला काय सांगते याचीच ही कविता आहे )
चल पुन्हा आपुल्या देशी, चल पुन्हा आपुल्या देशी,
वाट पाहतो रस्ता जिथला, तशाच जिथल्या वेशी ॥ चल पुन्हा ...॥
वाट पाहते सकाळ तिथली तुझी चहाला,
काम थांबते जरा, सांग रे सांग कशाला?
क्षणोक्षणी तव भास वाहती, येत्या वाऱ्यासरशी ॥ चल पुन्हा .. ॥
हरेक श्वासावरी काढते दृष्ट माउली
मिळते तुजला तिच्या प्रार्थनांचीच सावली,
चाहूल लागता तुझी, धावते ती रे दारापाशी ॥ चल पुन्हा... ॥
तिथे न तू, पण तिथेच तू रे त्यांच्यासाठी
इथेच तू, पण इथे न तू रे तुझ्याहिसाठी
क्षणात कितिदातरी मनाने जिकडे जाशी ॥ चल पुन्हा... ॥
करशिल साऱ्या पूर्ण अपेक्षा, त्यांच्या आशा ,
जाशिलही तू अजून दूरच्या परक्या देशा
पण मातीसुद्धा जिथली, तुजला वैभवराशी ॥ चल पुन्हा...॥
