मद्यालय हे, कोण कुठे पाजत बसते पण?
'जणू पाजली आहे' का वाटत बसते पण?
ओठ पिळावे, दूध निघावे, वय विश्वाचे
डाह्याभाईची गणिते घालत बसते पण
भोगुन गेला काल उधारीवर गणिकेला
आशेपोटी आज फुले माळत बसते पण
मी माझ्या चवदार तळ्याला मुक्त करवले
आधीची घटनाच पुन्हा चाळत बसते पण
धरणे भरली काल म्हणे एकवीस टक्के
भरलेली नसतील असे वाटत बसते पण
थांब्यावरच्या सहवासाला हृदय मिळाले?
हरकत नाही म्हणा तशी... त्रासत बसते पण
रामोजी नगरीमधली अस्मिता असावी
आतच असते, वेळेला लाजत बसते पण
