अभिमन्यू अन् आकांक्षांचे नाते आहे
दोघांसाठी अमरत्वाचे जाते आहे
भरडायाला काळाने ठेका धरला अन्
सटवाई तालावर ओवी गाते आहे
व्याजावर लावू बघणार्यांनी सांगावे
माणुसकी का बँकेमधले खाते आहे?
अपयश दैवावर मी इथवर ढकलत होतो
तेही आता संगत सोडुन जाते आहे
घाटावरुनी जिभल्या चाटत पंडित बघती
गंगेमध्ये शव कोणाचे न्हाते आहे
सांगा, नैराश्याला नावे का ठेवू मी?
ते तर माझ्या काव्याचे उद्गाते आहे
