असेच बंधनात राहू दे!
मला तुझ्या ऋणात राहू दे!!
तुझी झळाळती प्रभा माझ्या;
अशीच लोचनात राहू दे!
जरी तुला न याद मी आलो;
मला तुझ्या मनात राहू दे
भले न काळजात ओलावा;
निदान बोलण्यात राहू दे!
नसेन घोळक्यात मी कोठे....
मला दिशादिशात राहू दे!
तुझीच ओढ अन् तुझी प्रीती...
हरेक माणसात राहू दे!
मला तुझेच गीत गाऊ दे!
तुझ्याच पैंजणात राहू दे!!
नको महाल, राजवाडाही...
मला घराघरात राहू दे!
फुटेल पत्थरासही पाझर...
मनास या भ्रमात राहू दे!
पशुत्व माणसातुनी जावो....
ममत्व माणसात राहू दे!!
मिळो सुयोग्य स्थान प्रत्येका!
हिऱ्यास कोंदणात राहू दे!!
-------प्रा.सतीश देवपूरकर
भूशास्त्र व खानिज तेल तंत्रद्न्यान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१
