ह्यासोबत
प्रवासार्थ यम गेला होता नव्हता स्वीय गृहांत /
परतुनी ये तों स्वस्थ राहिला त्याची वाट पाहत //२५//
चवथे दिवशी येतां त्यातें कथिलें परिवार जनी /
' अतिथी पातला आज तयातें तीन जाहल्या रजनी //२६//
अतिथी ब्राह्मण सामान्य नव्हे केवल वैश्वानर की /
पाद्यादिजलीं शंतविती त्या ना तरी पडती नरकी //२७//
मान न पावे अन्नपान वा अतिथी जयाचे सदनीं /
दुरित तयाचें सिद्ध होय ते तत्सुकृताचे कदनीं //२८//
आशा सारी प्रतीक्षा तशी इष्टापुरतं फलां हो /
सूनृत भाषणफला तेविं तो जाणा आंचवला हो //२९//
अल्पबुद्धी तो; पशुपुत्रादिक त्याचे जाय लयातें /
अतिथी पावतां सत्कारावें यास्तव शि-घ्र तयातें //३०//
असे उपोषित म्हणुनी अम्हांवरी कुपित जाहला गमतो'/
परिसुनी यापरी नचिकेत्यातें सत्कारितसे यम तो //३१//
'विप्रश्रेष्ठा' यम मग बोले; जोडुनी तयास हात /
'त्रिदिन लागले तुला राहावे अनशन ताप सहात //३२//
पुज्य अतिथी परी नसे झाला येथ तुझा की /
हात जोडिता दोष सर्व हे उदरीं अपुल्या झाकी //३३//
माग तीन वर यथेच्छ मजसी कथितों तुजलांभावें /
जेणे होईल कोप शांत तव मंगल मज लाभावे '//३४//
वर मागितला पहिला तेणें पितयाचा संतोष /
'चिंता जाउनी' म्हणे 'तयाला न उरो स्वल्पही रोष //३५//
परतविले त्वां मज भूलोकी तेणें मनी जाणावे /
जाणुनियां हे प्रसन्न होउनी मजला वाखाणावे //३६//
यम मग बोले ' पुर्वी ऐशी ममता करील पिता की /
तशीच देतो बुद्धी तयातें संशय सारा टाकी //३७//
पाहुनी तुजला परविलें म्यांजाणुनी मनांत सारे /
न म्हणेल तुला आज्ञा मोडुनी आला परत कसा रे? //३८//
नगमेल तया रोष अल्पही त्यापरी पुढिल्या राती /
पूर्वी ऐशी येईल तया स्वस्थपणे निद्रा ती ' //३९//
यापरी देउनी आश्वासन ते यमराज उगाराही /
निश्चित तेणे गमे तया की मिळतो वर दुसराही //४०//
स्वर्लोकीचें सुख चिंतुनियां बोले दुसरा वर तो /
'न जरा स्वर्गी भय बा कसले, न कुणी प्राणी मरतो //४१//
क्षुधा तृषा ती न कुणा बाधे मग त्या शोक कशाचा? /
सर्वांहुनियां स्वर्ग लोक तो गमे सुखावह साचा //४२//
स्वर्लोकप्रद अग्निचयन ते ठावे तुम्हा स्वभावें /
बोध करावा मला तयाचा पुसतो तुम्हांस भावे '//४३//
यम मग बोले ' ज्ञान अग्नीचे ज्ञात्या केवळ ठावे /
हृदयं त्यांच्या गुप्त असे ते इतरां केविं पटावे? //४४//
सर्व सृष्टीला आश्रय दे जे; स्वर्गप्रद त्यापरिस /
ज्ञान तयाचें तुला सांगतो; सावध होउनी परिस' //४५//
इतुकें बोलुनी निरुपिलें मग त्याअग्निचयन त्या सांग /
यम मग बोले ' कळले तुज तरी पुनरपी मज ते सांग '//४६//
आदिभूत जो या सृष्टीचा अग्नी तयाचें ज्ञान /
पुनरपी कथितां नचिकेत्यानें यमें डुलविली मान //४७//
'आणिक वर घे तुष्ट तुजवरी ' यम बोले 'झालो की'/
अग्नी होय हा तुझिया नांवे ख्यात यापुढे लोकी //४८//
चातुर्याने तुझिया झाला तोष अंतरी माला /
स्वयें देतसें स्वीकारी की वररुपी हे माला //४९//
छायांना अग्नीचे तीन वेळ जोकरुनी शिष्टजनांशीं /
सख्य जोडुनी उल्लंघीना वेदस्मृतिवचनासी //५०//
यज्ञापरी करी अध्ययनातें धन सत्पात्री वेची /
जन्ममृत्यूची नचिकेत्या रे! भीती तयाला कैची //५१//
विश्वसृष्टा देव तयाचें ज्ञान तयाला पावे /
शांत होउनी नलगे त्यातें केव्हाही विलापावें //५२//
पाश मृत्यूचे तोडुनी तेणें स्वर्गी सुख भोगावे /
निरुपिले तुज चयन तयाचें कवणें यश हो गावें ' //५३//
ज्ञान जोडिलें वरें जयाचे तो हा अग्नी असारे! /
तुझिया नांवे ख्यात होउनी म्हणतील तुझाच सारे //५४
स्वयें दिला हा वर म्यां तुजला नोव्हे वर हा तिसरा /
तोच कधी मज निज वचनाचा नाही मजला विसरा ' //५५//
'वर हा तिसरा' नचिकेता मग बोले परिसावा हो /
संदेह मनी असे एक तो तेणें निरसावा हो //५६//
मृत्यू पावतां नर हा लोकी तनू ते गळोनी जाय /
नष्ट होतसे; दिसे दृष्टीला उरेल कोठे काय? //५७//
आत्मा म्हणुनी असे वेगळा म्हणती कोणी नर की /
यथाकर्म तो फळे भोगतो स्वर्गी अथवा नरकी //५८//
शिष्टजनांही कथितां या परी संशय केविं गळावा? /
म्हणे आपुल्या कृपेकरुनी मज आशय सत्य कळावा //५९//
' न नरां केवळ ' यम बोले ' हा संशय दैवांनाही /
त्यांनी केली चर्चा बहू परी निरस्त झाला नाही //६०//
देवांतेंहीं अगम्य ऐसा धर्म सूक्ष्म हा फार /
स्पष्ट दिसे मज बाळा! तुझिया बुद्धिबळाच्या पार //६१//
वर माग दुजा; करी योजना लाभ आणखी जोड /
हट न करावा अति केव्हाही आशा याची सोड //६२//
'सहज कळेना म्हणतां 'बोले नचिकेता ऐकोनी /
'धर्म हा कळे ऐसा म्हणतां नसे सुरांतही कोणी //६३//
तुम्हांपरी परी वक्ता न दिसे तो मज सांगायासी /
वरही न ऐसा तोच म्हणोनी झडकरी सांगा यासी'//६४//
'पुत्र पौत्र घे शतायू मागुनी'दावी माया यम ही /
'राज्य करावे वाटेल तरी घेई मागोन मही //६५//
हत्ती, घोडे, मागुनी घे वा नानाविध पशुगण तो /
मागसी तितुकीं वर्षे त्यापरी आयुही देतो म्हणतो //६६//
धन घे मागुनी; चिरायुष्य घे; न काय त्यापरी वर हा? /
भुमंडल घे; राज्य तयांचें चिरकाल करीत राहा //६७//
असेल चित्तीं काम सांग तो दुर्लभ येथे जरी तो /
साशंक नको होऊ बाळा! त्वरित पूर्णं तो करितों //६८//
रथवाद्यांसह घे भोगाया सुंदर अप्सरसा वा /
लाभ जयांचा भूलोकी कोणतेही नसावा //६९//
स्वर्गींच्या या स्त्रिया न त्यांचा अव्हेर करावयास /
सेवा घेई करोनी; होवो अखंड तुज सहवास //७०//
प्राणी जाती मरोनी जगती म्हणती तो मेला हो /
नको पुसू मज; कोठे जातो? काय तुज तरी लाहो '//७१//
नचिकेता परी मोहित नोहे तसाच सावध राहे /
म्हणे 'आपुले भोग सर्वही सांभाळोनी धरा हे //७२//
आज भोगू परी नसे उद्यांचा त्या विषयी विश्वास /
सुख सुख म्हणतां जर्जर करिती साऱ्याही विश्वास //७३//
इंद्रियगण हा तेज तयाचें नेती सर्व हरोनी /
घे घे म्हणतां मोहक परी ते दिसती मात्र वरोनी //७४//
आयुष्य तुम्ही किती दिले तरी मृत्यू न चुकावयाचा /
दीर्घही म्हणुनी अल्प गमे मग कसला लाभ तयाचा! //७५//
यथेच्छ धन ते मिळेल देवा तुमची मूर्ती पाहता /
त्यापरी येई जिवांच्याही आयुष्य दीर्घ हाता //७६//
तुमचे हाती सत्ता सारी नलगे श्रम मज परी, ते, /
अनुदिनी त्याने तृष्णा वाढे, तृप्ती न चित्तीं करितें //७७//
दावुनी माया विविध म्हणोनी मोहित मजला न कराहो /
हाच मला द्या वर; सुख सारे ते चित्तादिक राहो //७८//
अजरामर, जे देव तुम्हांशीं येउनी मर्त्य जनांहीं /
वित्तादिक ही जोडावी का? ज्यात नित्यता नाही //७९//
सुख हे अस्थिर म्हणुनी भावना जेणे दृढ केली /
दीर्घायुष्यी वृत्ती तयाची होई काय भुकेली //८०//
संशय जो की प्राणी मरतां आत्मा म्हणती नसावा /
परत्र कोणी जातो म्हणती सारा तो निरसावा //८१//
गुप्त गुप्त ते म्हणुनी सांगतां व्यक्त करा ते मजलां /
नको दुजा वर; तोच घ्यावया नचिकेता हा सजला '//८२//