माझा निरपेक्ष हो बाणा
माझ्या पाठीत नाही कणा
तिथे फुटली आरोळी
करा करा रे खांडोळी
झाली रक्ताची थारोळी
माझा निरपेक्ष हो बाणा
माझ्या पाठीत नाही कणा
माझी नवाची कचेरी
देते मला हो भाकरी
माझी भली ती चाकरी
माझा निरपेक्ष हो बाणा
माझ्या पाठीत नाही कणा
कसले जीव नि कसले प्राण?
विकला कधीच मी स्वाभिमान!
जगलो वाचलो खुदा मेहेरबान!!
माझा निरपेक्ष हो बाणा
माझ्या पाठीत नाही कणा
माझे रक्त नाही आटत
माझा जीव नाही पेटत
माझे काळीज नाही फुटत
माझा निरपेक्ष हो बाणा
कसली छाती नि कसला कणा!
ते म्हणाले "बन दगड"
म्हणून मी बनलो दगड!!!
