काळजाला एवढे नादावणारे,
कोण आहे सारखे बोलावणारे?
वादळांनो दार का लोटून घेता?
यायचे कोणीतरी ठोठावणारे!
मी सुखाला भेटलो नाही कधीही
भेटलेले दु:खही वेडावणारे
पाहिले जेरीस येणे उत्तरांचे
(प्रश्नही होते तसे भांबावणारे!)
होय वेडे,मीच तो प्राजक्त आहे
वेगळे नाही कुणी डोकावणारे!
कोंब स्वप्नांचे नव्याने येत गेले
रिक्त डोळे व्हायचे ओलावणारे
काय? कोऱ्या कागदांनी बंड केला?
(शब्द मागे लागले भंडावणारे)
नाव माझे टाकले मी, काय झाले?
कोण होते नाव मोठे लावणारे?
पेटणारी लाकडे होती इमानी
रक्त कैसे आमचे थंडावणारे?
-कापूसकोंड्या