जपले मनातल्या मनात चांदणे 
                                   हृदयात चंद्र काळजात चांदणे

                                   होतो चकोर जीव, बोलताच तू
                                   झरते तुझ्या स्वरास्वरात चांदणे

                                   आहे सभोवताल वाळवंट... पण
                                   झळ लागते न ज्या घरात चांदणे

                                   मी पाहिले तुला, न व्यर्थ भास हा
                                   आले भरात, भर उन्हात चांदणे

                                   कोजागिरी जणू मधाळ पत्र हे
                                   मजकूर चंद्र,अक्षरात चांदणे

                                  नाहीत अक्षता,नकोत मंत्र ही
                                  सजल्यात तारका,वरात चांदणे

                                  बघताच तू हसून, रात्र झगमगे
                                  उजळे तुझ्याच चांदण्यात चांदणे

                                                                   प्रमोद बेजकर