वसुंधरे नुरे तुझ्यात कल्पनाच वेगळी
रचायला हवी अता वसुंधराच वेगळी
उगाच सांगतेस कारणे न आवडायची
मलाच मी न आवडे तुझी कथाच वेगळी
उगाच मोहवायचा प्रयत्न चालतो तुझा
न मीच आवडे मला तुझी कथाच वेगळी
नवीन वाट घेतली तरी तिथेच पोचतो
वळून पाहतो असा जणू दिशाच वेगळी
करार मोडतोस, तेच देत राहतोस तू
जुनेच श्वास वाटतोस घेत लाच वेगळी
मनास लागल्या कळा प्रसूतकाळच्या पुन्हा
निघायची असेल एक भावनाच वेगळी
तुझेच बिंब शेवटी दिसेल या मनामधे
टिकेल, जाहली जरी फुटून काच वेगळी
बराच काळ जाहला 'असे' म्हणून मी तुला
हसून घे मिठीत, वाग एकदाच वेगळी
घशात जात लोचनात येत मद्य बोलले
तुझी नशाच वेगळी, तुझी अदाच वेगळी
