जेव्हा जेव्हा उदास असते माझे मन
तेव्हा तुलाच का आठवते माझे मन?...
आठवणींना सदैव जपते माझे मन
जुनी जखम का पुन: छेडते माझे मन?...
मनाप्रमाणे वागत नाही मी तेव्हा
माझ्यावरतीही का रुसते माझे मन?...
या स्वप्नांच्या मागे धावुन फसलो मी
तरिही स्वप्ने अजून बघते माझे मन...
मनात गाणे म्हणतो, कविता रचतो मी
आनंदाने पुन: बहरते माझे मन...
प्रेम तुझ्यावर केले आहे मनोमनी
तुझ्या चुकांना कसे विसरते माझे मन?...
स्वतःस दुखले तरी चालते मनास ह्या
विचार दुसऱ्याचा का करते माझे मन?...
कमाल आहे 'अजब' मनाची खरोखरी
क्षणात हसते, क्षणात रडते माझे मन...
