हो. शत्रूने केलेल्या नर्व्हगॅस च्या माऱ्यापासून सैनिकांचे संरक्षण करण्यासाठी असा उपयोग भविष्यात होण्याची शक्यता निर्माण झालेली आहे. अशा विषारी ऒर्गॅनोफॉस्फेट च्या रेणूशी भिडून त्याला निकामी करणारे जवळ जवळ १५ किलो औषध जनुकसंस्कारित शेळीच्या दुधापासून निर्माण करता आलेले आहे.
नॅशनल ऍकॅडमी ऑफ सायन्स च्या जर्नलमध्ये ही माहिती आलेली आहे त्यात मला शोधता आली ती येथे आहे.
नर्व्हगॅसच्या संपर्कात आलेल्या लोकांवर ह्या (ब्युटिरिलकोलिनेस्ट्रेस) औषधाने उपचार करता येईल. रणांगणात नर्व्हगॅसच्या संपर्कात येणाऱ्या सैनिकांवर किंवा अतिरेक्यांनी रासायनिक शस्त्रास्त्रांनी मारा केल्यास त्या शहरातल्या लोकांवर हा रामबाण उपाय होईल असे वाटते.
तसे माणसाचे शरीर हे औषध आतल्या आत बनवतेच आणि रक्तापासून वेगळे काढताही येते पण त्याचे प्रमाण अत्यल्प आहे.
औषधाचे हे रेणू बनवणे अतिशय जिकिरीचे आहे आतापर्यंत मिलिग्रॅमच्या हिशेबातच हे शक्य होत असे मात्र आता चित्र बदलेल.
काय करतात, माणसाचा डीएनए एका सदिश रेणूत 'बसवून' तो शेळीच्या गर्भात सारतात. अशा गर्भातून जन्मून मोठी झालेली शेळी माणसाला सुयोग्य होईल असे ब्युटिरिलकोलिनेस्ट्रेस औषध आपल्या दुधात निर्माण करते. नंतर शेळीच्या दुधापासून ते वेगळे काढून साठवून ठेवता येते.
सध्या उपयोगात दुसरी औषधे आहेत; पण ती रक्तातून त्वरित नाहिशी होतात आणि सैनिक वाचलाच तरीसुद्धा चेतासंस्थेच्या गंभीर स्वरूपाच्या दुखापती होण्याची शक्यता राहिलेलीच असते. ह्या औषधाचे तसे नाही. सैनिक तर वाचेलच शिवाय पुन्हा लढायला सिद्धही होऊ शकेल. (अमेरिकेच्या संरक्षण खात्याने ह्या संशोधन-विकासासाठी उत्पादक कंपनीला २१३ दशलक्ष डॉ निधी पुरवलेला आहे.)
अर्थात अजून बराच अवकाश आहे. सुरक्षिततेच्या कसोट्या पार करून अमेरिकेच्या सरकारची मान्यता मिळायची आहे.
मी हे सगळे बीबीसीच्या ह्या पानावर वाचले. चित्र मात्र पॉप्युलर सायन्सच्या पानावरून घेतले.
तुम्हीही तिथे किंवा नेटावर इतर ठिकाणी आणखी काही नवी माहिती मिळते का ते शोधून पाहा.