घडेल कोणत्या क्षणास आपसूक कोणती ?
वसंत पाहुनी तुझा घडेल चूक कोणती ?

जसे जसे उधाणले कळीवरी तरूणपण
दिसू खट्याळ लागली नवी चुणूक कोणती ?

कसे तुझे फुलारणे कळे मला दुरूनही ?
तुझा सुगंध वाहते तरी झुळूक कोणती ?

अनंगरंग एक एक अंग भासते गझल
जगास दाखवू करून श्ब्दरूप कोणती ?

कशास तू उरास टोचतोस कंटकापरी ?
फुला तुझी अशोभनीय वागणूक कोणती ?

भरून पावतो कसा बघून फक्त मी तुला ?
प्रमत्त यौवनात ही विदेह भूक कोणती ?