एकदा...

एकदा तिच्या संगे मी पावसात भिजलो होतो...

बेलगाम आवेगाच्या वादळात घुसलो होतो               १

वादळात घुसल्यावरती वाढले पुराचे पाणी...

कळले न कधी लाटांनी मी पुरा वेढलो होतो             २

वेढताच मज लाटांनी अदृश्य किनारे झाले...

बुडल्यावर लोक म्हणाले मी खोल उतरलो होतो       ३

उतरलो खोल होतोच जगण्याचा ठाव बघाया...

फेकून मुखवटे सारे नागवा जाहलो होतो                    ४

नागवेपणाचे ओझे पेलवले नाही जेव्हा...

लाजेच्या निकडीसाठी वस्त्रात अडकलो होतो             ५

वस्त्रात अडकल्यावरती लपवीतच गेलो सारे...

वाटले जगाला तेव्हा मी सुंदर सजलो होतो                ६

सजल्यावर स्वागत होते कळताच सभ्यता शिकलो...

पोषाखी अस्तित्वाच्या गर्दीत हरवलो होतो                   ७

हरवलो असा की आता पाऊस नकोसा होतो...

तो धुंवाधार आल्यावर खिडकीशी थिजलो होतो          ८

                                                          हेमंत राजाराम