मनोगतावर नवीन आहे. आणि कविता करणेहि नवीन (१-२ महिने).आपण दिगज्जांनी सांभाळून घ्यावे. improvement साठि सुचना स्वागतार्ह.
हि माझी पहिली कविता आहे.

हे बंध रेशमाचे

स्मरते हुरहूर ती , चाहूल प्रथम प्रीतीची
न जाणे जुळले कधी , हे बंध रेशमाचे

गुंतता अलगद मने , पडली गाठ जन्माची
सुटता सुटे ना ऐसे , हे बंध रेशमाचे

विहरत्या पाखरांना , छाया जशी तरुची
देती तसा विसावा , हे बंध रेशमाचे

भंगले अचानक सूर , दृष्ट लागली कुणाची
आज तुटल्या तारा जणु , हे बंध रेशमाचे

उरला फक्त दुरावा , लोपली ओढ भेटिची
निःशब्द करोनी गेले, हे बंध रेशमाचे

आठवता प्रेमगाथा , कळ येते वेदनेची
जाहले बोचरे कैसे , हे बंध रेशमाचे

कळेल तुजला कधी, हि आग अंतरिची
दाहक असो तरिहि , हे बंध रेशमाचे