संधिकाल , पूर्वराग , धुंद बैसलीस गात
मोहरून तेवते दिव्यादिव्यात सांजवात
केस मोकळे , शशीसमान चेहरा तशात
चंद्रबिंब लाजुनी लपेल मेघपल्लवात
भेट अल्प जाहली , सले अपूर्णता उरात
मी जगून घेतले , युगांस, चोरल्या क्षणात
तूच छेडलीस तान , ही तुझीच आर्त साद
सूर हेच खेळतात माझिया नसानसात
मंत्रमुग्ध ऐकतो तुझे अपूर्व यक्षगान
नर्तनास , किन्नरी, तुझ्या नसे तुला जगात
नांदतेस जाणिवांत , भारतेस नेणिवेस
तू मनातला हुरूप , पंचप्राण जीवनात
छत्र-चामरें कशास , गंधयुक्त श्वेतपुष्प
ढाळतो शिरी तुझ्याच , अंगणात पारिजात
भंगला तुला बघून , साहवे न रूप त्यास
हाय , टाकला कटाक्ष , तू उगाच आरशात
काफिला जुना नको , न मैफली , न मोहजाल
सप्तस्वर्ग निर्मिलेस , राहुटीत , काननात
मोरपीस का फिरे , कशी शहारली पहाट
घेतलास तू हळूच सोडवून गौर हात
तू परीस देवदत्त , लाभलीस पामरास
या सजीव फत्तरास आणलेस माणसात