डवरलेल्या मोगऱ्याचे स्वप्न होते पाहिले
त्यावरी गुंजारवाचे स्वप्न होते पाहिले

कोमलांगी कुसुम होते व्यापुनी माझ्या मना
पाकळ्यांच्या बंधनाचे स्वप्न होते पाहिले

बैठकीच्या लावणीची आस मी धरली जरी
जोगियाच्या तू सुरांचे स्वप्न होते पाहिले

हुंगण्या गंधास ज्याच्या जाहलो वेडापिसा
त्या फुलाने देवळाचे स्वप्न होते पाहिले

मोगऱ्याच्या रंगलो मी मोतिया रंगी, न तू
श्यामरूपी काजळाचे स्वप्न होते पाहिले

वाहिले सर्वस्व, देवा, मोगऱ्याने पाउली
संगमा देहातिताचे स्वप्न होते पाहिले

पाहतो जो तो स्वतःचे सौख्य स्वप्नी आपल्या
का उगा कोणी कुणाचे स्वप्न होते पाहिले

राहु दे पश्चात माझ्या ओळ एखादी तरी
शारदे, मी अक्षराचे स्वप्न होते पाहिले