चिकवड्या

  • अर्धी वाटी साबुदाणा
  • ४ वाट्या पाणी
  • चवीपुरते मीठ
१ तास
२ जण

क्रमवार मार्गदर्शन : अर्धी वाटी साबुदाणा रात्री भिजवून ठेवा. साबुदाणा खिचडीला
जसा साबुदाणा भिजवतो तसा भिजवा. त्यात थोडे पाणी राहू द्या. सकाळी भिजलेला साबुदाणा
हाताने मोकळा करून घ्या. मध्यम आचेवर पातेले ठेवा व त्यात ४ वाट्या पाणी व मीठ
घाला. नंतर त्यात मोकळा केलेला साबुदाणा घाला व हे मिश्रण शिजवा. शिजवताना डावेने
हे मिश्रण ढवळत राहा म्हणजे पातेल्याला खाली लागणार नाही. पळीवाढे इतपत मिश्रण आटले
की गॅस बंद करा. साबुदाणा शिजला की त्याचा पांढरा रंग जाईल म्हणजे मिश्रण झाले असे
समजावे.

नंतर प्लॅस्टीकच्या कागदावर चिकवड्या घाला. चिकवड्या घालताना जवळ जवळ
घाला म्हणजे बऱ्याच चिकवड्या कागदावर मावतील. चिकवड्या चमच्याने घाला. चमच्याने
मिश्रण कागदावर घातले की थोड्या गोल आकार देऊन पसरवा. चिकवड्या जास्त पातळ नको व
जाडही नकोत. चिकवड्यांना वाळवण्यासाठी खूप कडक ऊन लागते. २-३ तास कडक उन्हात
चिकवड्या वाळल्या की हलक्या हाताने त्यांना उलटवा व दुसऱ्या बाजूने परत २-३ तास ऊन
दाखवा. म्हणजे दोन्ही बाजूने चिकवड्या पूर्णपणे वाळतील. नंतर चिकवड्या एका
पातेल्यात घाला व दुसऱ्या दिवशी परत उन्हात ठेवा. चिकवड्या चांगल्या कडकडीत वाळल्या
पाहिजेत म्हणजे छान फुलतात. नंतर गरम तेलात चिकवड्या तळून भाजक्या शेंगदाण्याबरोबर
खा. खूप छान लागतात. उपवासाला या चिकवड्या चालतात. अर्धी वाटी साबुदाण्यात छोट्या
चिकवड्या ६० ते ६५ होतात. चित्रात आहेत त्या हलक्या फुलक्या कुरकुरीत तळलेल्या चिकवड्या आहेत.

टीपा नाहीत.

सौ आई