तयारी -

कांदे उभे पातळ चिरून घेणे. लसूण सोलून हलक्या हाताने ठेचणे. आले छोट्या किसणीने किसून घेणे. मिरच्यांचे मोठे तुकडे करणे.

भात एका परातीत पसरून त्यावर थोडी हळद, तिखट व चवीनुसार मीठ टाकून व्यवस्थित कालवून घेणे. कालवताना हाताला तेल लावावे. 

कृती-

कढईत तेल गरम करायला ठेवणे. तेल कडकडीत तापल्यावर त्यात मोहरी, जिरे, हिंग, कढीपत्ता टाकून फोडणी देणे. त्यावर कांदा, लसूण व आले टाकून कांदा लाल होईपर्यंत परतणे. परतल्यावर मग गोडा मसाला व मिरचीचे तुकडे टाकणे.  

(काळे वांगे टाकायचे असल्यास, वांग्याच्या छोट्या-मध्यम फोडी करून टाकणे व फोडी तुटणार नाहीत ही काळजी घेऊन परतणे. बटाटा टाकायचा असल्यास बटाट्याच्या पातळ काचऱ्या करून टाकणे - शिजण्यासाठी वर झाकण ठेवून मंद आचेवर शिजवणे) 

ह्यांत भात व त्यावर कोथंबीर टाकून व्यवस्थित परतणे. पूर्णं परतला गेल्यावर - परत झाकण ठेवून पाच मिनिटे मंद आचेवर ठेवणे.

गरम गरम वाढताना फ्रीजमधल्या थंड दह्याबरोबर द्यावा.