खोड
वादळाने पाठ माझी, सोडली आहे कुठे ?
अन् तरीही खोड माझी, मोडली आहे कुठे ?
भेटणारा भेटतो अन् टाळणारा टाळतो
मी तशी पाटी घरावर, लावली आहे कुठे ?
योजना असतात मोठया, छावणीच्या नेहमी
पण लढाई कैक वर्षे, जाहली आहे कुठे ?
संपलो आहे कधीचा, पाहुनी करुणा तुझी
जीवघेणी क्रूरता मी, पाहिली आहे कुठे ?
मी किनाऱ्याचा भरोसा, ठेवला होता जरी .....
आर्त माझी हाक त्याने, ऐकली आहे कुठे ?
आसवांच्या त्या पुरातच, काल सारे संपले
वादळाला आज संधी, राहिली आहे कुठे ?
सर्व प्रेमाच्या कहाण्या, चांगल्या असतीलही
पण तुम्ही माझी कहाणी, ऐकली आहे कुठे ?
मी फुलांचे घावसुध्दा टाळतो आहे अता ...
सोसण्याला जिंदगीही, राहिली आहे कुठे ?
- यादगार
