दिवे,चंद्र,तारे अता मालवू दे
नव्या जीवनाची निशा ज़ागवू दे
कशी रंगते संगती मी तुझ्या ते
पुन्हा, वेगळे रंगुनी, दाखवू दे
ज़री संपले शब्द माझे तुझे अन्
खुणा बोलती, बोलणे वाढवू दे
गळाभेट घेते तुझ्या लोचनांची
मिठीनेच त्यांच्या मला लाज़वू दे
उरावे किती अन् कसे हे बहाणे?!
विसरण्या स्वतःला तयां आठवू दे
ज़से हुळहुळावे उरी पाकळ्यांनी
तुझे श्वास गाली तसे खेळवू दे
तुझे ओठ की गोडवा अमृताचा?
मुखी तू मला, मी तुला साठवू दे
सख्या,थांब थोडा. चुके एक ठोका,
तरी धीट मी, हे तुला भासवू दे