बटाट्याची साले काढून बटाटे धुवून घ्या. नंतर त्याचे गोल पातळ काप करा. डाळीच्या पीठामध्ये लाल तिखट, धनेजीरे पूड, चिरलेली कोथिंबीर, व चवीपुरते मीठ घालून पातळ पीठ भिजवा. पीठ खूप पातळ नको. मध्यम आचेवर कढईत पुरेसे तेल तापवून घ्या. भिजलेले पीठ थोडे गरम केलेल्या तेलामध्ये घाला ते फुलून वर येईल व तेलावर तरंगायला लागेल म्हणजे हे तेल भजी तळण्यासाठी पुरेसे तापलेले आहे असे समजावे. नंतर कापलेले बटाट्याचे काप एकेक करून भिजलेल्या पीठामध्ये बुडवून तेलात सोडा. काही सेकंदांनी ही भजी झाऱ्याने उलटी करा. तांबुस रंग येईपर्यंत तळा, म्हणजे पक्की तळली जातील. यासोबत लसणीची चटणी, दाण्याची चटणी, आंब्याचे लोणचे व चिंचेचा ठेचा मस्त लागतो. गरम आमटी भाताबरोबर ही भजी छान लागतात.