गेले काही दिवस हे विचार पाठ सोडत नाहीत. काहीतरी खटकते आहे म्हणूनच त्यांची मनातली वस्ती काही हटत नाही. ह्यावर अनेक जणांचे विचार, आवेश, त्रागा व तटस्थता वाचली. पण सल काही कमी झाला नाही.

मी एका राष्ट्रीयकृत बँकेतून निवृत्त झालो. या कार्यकालात काही काळ निरिक्षक म्हणूनही काम केले. ते करत असता मनुष्य स्वभावाचे विविध नमुने पहायला मिळाले. शाखा-व्यवस्थापक कित्येकदा त्यांच्या कामाच्या ओझ्यामुळे अतिशय त्रस्त असत. निरिक्षणाच्या कार्यालयीन कामाबरोबरच त्या-त्या शाखा-व्यवस्थपकांचे मनोधैर्य संभाळण्याचे काम देखील करावे लागे.