छंदसाचा, शब्दवैभव, बाज होता
अंतरीचा पण कुठे आवाज होता ?
पाडता यांत्रिकपणे मी दोन ओळी
वाटले मज शेर खटकेबाज होता
वाटले मीही करावे काव्य थोडे
वाटले चिलटास तोही बाज़ होता
आग शब्दांतील होती कापरासम
तो कुठे वागीश्वरीचा याज होता ?
तोंडदेखी वाहवा मागून झाली
वाचताना चेहरा नाराज होता
न्यून का दडते कधी आभूषणांनी ?
चढवला प्रतिभामढ्याला साज होता
माणसा तुज रोज का होतोय घाटा ?
हेच उत्तर, "देव सट्टेबाज होता" !