प्रत्येक कठिण प्रसंगी जगाने धांवून यावे नि तुम्हाला सोडवावे, अशी अपेक्षाच करू नका. तसे होणारही नाही. परमेश्वरावर अढळ श्रद्धा असूं द्या. परमेश्वर पाठीशी असेल आणि सारी दुनिया जरी तुमच्या विरोधात उभी ठाकली, तरीही तुम्ही यशस्वी व्हाल. पण परमेश्वरी साहाय्य नसताना साऱ्या दुनियेच्या साहाय्यानेदेखील तुम्ही हराल. म्हणूनच परमेश्वराची मैत्री संपादन करा. ती परमोच्च संपत्ती आहे. कोणत्याही आपत्तीतून तो सहीसलामत तुम्हाला तारेल. क्षुद्रवृत्ती, कावेबाजपणा, नीच प्रवृत्ती, स्वार्थीपणा हे जे दुर्जनांचे गुण आहेत, त्यांचा त्याग करा. सर्वसमानता अंगी बाणवा.
