प्रश्न कळ्यांचे, वेड्या मनांचे (भाग-१)
ती माझ्यासमोर खाली मान घालून उभी होती. मी तिला विचारत होते,' अग, इतकी चांगली हुशार आणि अभ्यासू मुलगी तू! अचानक तासांना बसणं बंद का केलंस? काही अडचण आहे का?' पण तिची मान काही वर होत नव्हती. मी म्हटलं,'खरं सांगू का? तू नाही सांगितलंस तरी मला माहीत आहे. तू एका मुलाला रोज भेटतेस आणि त्याच्याशी तासन्तास गप्पा मारतेस. हो ना?' ती गप्प. भोळ्याभाबड्या चेहऱ्यावर काहीसे भीतीचे भाव. घाबरू नकोस. मी शिक्षक म्हणून नाही, तुझी मैत्रीण म्हणून बोलते. ज्याला तू भेटतेस तो मस्तपैकी बाईकवर बसून असतो, तू मात्र एकदा या पायावर एकदा त्या पायावर जोर देऊन ताटकळत उभी असतेस. अग, प्रेमात पडणं चूक आहे असं मला मुळीच म्हणायचं नाही. त्याचं जर तुझ्यावर खरंच प्रेम असेल तर तो तुझ्या करिअरच्या आड मुळीच येणार नाही. त्याला विचारून तर बघ. बारावीची परीक्षा होईपर्यंत तो थांबला तर बारावी पण पार पडेल आणि तुम्हाला एकमेकांच्या प्रेमाची परीक्षा पण होऊन जाईल. बघ, तुला पटतंय का ते?'
